कुणास सांगू गुदमर आता खुल्या मनाने?
हास्य लेउनी किती सहावे आत्मबलाने?
रडल्यानेही हलके हलके जरा वाटते
जसे वाटते तसे भेटते क्रमाक्रमाने
दूर असू द्या आठवणींच्या झुंडी सार्या
"आज" जरासा शिका जगाया खुलेपणाने
नको नकोशी तरी जन्मले! सुतकी चेहरे
कुत्रे रडले जन्मातच मी आकांताने
जसा संपतो काळ फुलांचा, निर्माल्याला
मरगळ येते अर्थहीन जगणे बनल्याने
पास जाहलो दहावीत अन् लगे नोकरी!
तेंव्हा नव्हत्या स्पर्धा लढण्या प्राणपणाने
लाच खाउनी चालवला वारसा घराचा
"नेतो धन तो नेता" लिहिले कौटिल्याने
जहाल वास्तव, उन्हात जीवन जगता जगता
हिरवळ दिसते बालपणाला आठवल्याने
थांबव तू "निशिकांत" जोगवा मागुन जगणे
फसवतोस का जगास अंबेच्या नावाने?
निशिकांत देशपांडे, पुणे.
मो. क्र. ९८९०७ ९९०२३
वृत्त--अनलज्वाला (मात्रा--२४)
No comments:
Post a Comment