असावे सूत्र जगण्याचे

 

उगाळावे कशाला दु:ख अपुले सात जन्माचे?

कधी हसणे, कधी रडणे असावे सूत्र जगण्याचे

किती आहेत वाटा! पण तरीही एक निवडूनी

धरोनी हात माझा मी, पुढे आहे निघायाचे

जरी कंटाळल्या भिंती घराचे मौन भोगूनी

अबोल्याचे व्यसन जावे कसे श्रीमंत तबक्याचे?

म्हणे स्वर्गात स्त्रीला मान! लक्ष्मी पाय का चुरते?

दिले का अप्सरांना काम देवांना रिझवण्याचे?

असावे फक्त ट्रेलर हे गुन्ह्याचे, दुर्गुणाचे पण

आता होईल चित्रण पूर्ण नेत्यांच्या कुकर्माचे

कुणाला पाहिजे खुर्ची, कुणाला पाहिजे सोफा

सुखांची हाव जेथे, काम नसते गोणपाटाचे

नव्या रक्तास द्यावा वाव म्हणता पक्षश्रेष्ठीने

पुढारी नाव देती फक्त का  अपुल्या अपत्त्याचे ?

नका सांगू मुलांना गोष्ट ती लाकूडतोड्याची

बघावे लागते त्यांना सदा हरणेच सत्त्याचे

तुझे "निशिकांत" आहे राजकारण वेगळे इतके!

प्रवाहाच्या विरोधी तत्व जपणे काय कामाचे?

निशिकांत देशपांडे, पुणे.

मो. क्र. ९८९०७ ९९०२३

वृत्त--वियदगंगा

लगावली--लगागागा X ४