आज स्वप्ने उद्याची
कुणी छेडली तार माझ्या मनाची ?
कशी जागली आज स्वप्ने उद्याची ?
तिची पैंंजणे वाजता काय जादू!
मनी कोरड्या ओल झिरपावयाची
फुलांचे जरी होत निर्माल्य असते
कळ्यांना तरी, हौस उमलावयाची
कधी जगरहाटी कुणी का बदलते?
जशी काल, ती आज पाळावयाची
जरी ध्येय मार्गात खाचा नि खळगे
तयारी असूद्या पुढे जावयाची
हवेशी सलोखा फुलांनो करावा
तिला हौस मधुगंध पसरावयाची
नको धृवपद अन् नको धृवतारा
मला लागली ओढ नात्यातल्याची
कधी प्राक्तनाशी न केली लढाई
नको हाव हरवायची, जिंकण्याची
नको काल " निशिकांत " स्मरणात आणू
जुनी का जखम आज उकरावयाची?
निशिकांत देशपांडे, पुणे.
मो. क्र. ९८९०७ ९९०२३
No comments:
Post a Comment