बोलवावे एकदा
पुस्तकातिल माणसांना बोलवावे एकदा
मार्ग तुमचा सोडला! सॉरी म्हणावे एकदा
काळजीने मी उद्याच्या रात्र सारी जागतो
यत्न करुनी "आज "ही जगण्या शिकावे एकदा
भाग्य देते दैव नेते, न्याय काला या जगी?
दैववादी भूमिकांना ठोकरावे एकदा
जो स्मशानी काष्ट विकुनी पोट भरतो तो म्हणे
माणसांनी फक्त देवा का मरावे एकदा?
"लोक म्हणती काय?" झाली टांगती तलवार ही
सुरकुत्यांच्या आडचे ही दाखवावे एकदा
जाळली ज्यांनी घरे, ती शांतता समितीवरी
वाटले शांतीस तेंव्हा वादळावे एकदा
मानवी हक्कात लपती राष्ट्रद्रोही केवढे!
फास मानेभोवताली करकचावे एकदा
वास्तवाच्या काळजीचा काळजाला त्रास का?
रम्य अपुले बालपणही आठवावे एकदा
का जगावे वाटते "निशिकांत "ला अंतःक्षणी?
आपुल्यातच गुंतणेही अनुभवावे एकदा
निशिकांत देशपांडे, पुणे.
मो. क्र. ९८९०७ ९९०२३
No comments:
Post a Comment