वाहतो मी भार आहे

अस्थिपंजर सापळ्याचा वाहतो मी भार आहे
थांबतो ना श्वास, जगणे एक सोपस्कार आहे

सोंग केले माय अंबा अंतरी संचारते अन्
जोगवा मागून माझा चालला संसार आहे

जे न पटते, लोकलज्जेस्तव करावे लागता ते
मीच केलेला मनाशी माझिया व्यभिचार आहे

ईश्वरी कोपास भिउनी पाळतो रूढी प्रथांना
नाव गोंडस त्यास देतो "आमचा संस्कार आहे"

ऑनलाइन शिक्षणाची पध्दती अवलंबिल्याने
गुरुजनांच्या शिकवण्यांचा बैसला व्यापार आहे

बायकोने हे करावे अन् मुलांनी ते करावे
दोन नात्यांचा दुवा का जाहला व्यवहार आहे?

घ्यायची तू तेवढी घे जीवना माझी परिक्षा
जिद्द जगण्याची चिरंजिव, केवढी दमदार आहे!

आज लिहिता एक कविता गुंफण्याला क्षण सुखांचे
आर्तता आली सखे पण जाहली लयदार आहे

का उगा "निशिकांत" द्यावा तत्व, मुल्यांचा मुलामा
त्रास इतरांना न द्यावा, जीवनाचे सार आहे


निशिकांत देशपांडे, पुणे.
मो.क्र. ९८९०७ ९९०२३