संपवले होते जरी दुरावे

 

वादाला का पुन्हा अचानक तोंड फुटावे?

चर्चेने संपवले होते जरी दुरावे

नको अपेक्षा आपसात ठेवणे यापुढे

"वागावे तू असे! आणि मी तसे करावे!"

हवी कशाला नारायण होण्याची स्वप्ने?

अंतरातल्या नरास हो माणूस म्हणावे

वाट शोधता आयुष्याची वाट लागली

वाट कोणती चालू? मी का कुणा पुसावे?

अर्जामध्ये जात दावता "माणुसकी" मी

चूक काय ती! सर्व जगाने मला हसावे

पुण्य थोडके, पाप वाहते घडा भरोनी

पाप धुवाया पुण्य पसाभर कसे पुरावे?

चौदा वर्षे मजेत गेली वनवासाची

सुमित्रेस का असे वाल्मिकी दुर्लक्षावे?

मूलमंत्र सहजीवन जगण्यासाठी हा की

दोघांनीही जिंकावे, ना कुणी हरावे

मनासारखे जगावयाला "निशिकाता"ने

"लोक काय म्हणतील?" काळजीग्रस्त नसावे

निशिकांत देशपांडे, पुणे.

मो.क्र. ९८९०७ ९९०२३