आठवणींचा मनात वावर

 फुटपट्टीने मोजतेस का उगाच दोघांमधले अंतर?

अंतर आहे म्हणून असतो आठवणींचा मनात वावर

दरी मिटवण्या आधी बोलू, काय चांगले घडले यावर

मतांतरांच्या मुद्द्यावरही आज नको, बोलू या नंतर

दान अल्पसे करून बनती दानशूर का सारे गब्बर?

प्रयत्न असतो लपवायाचा पापाने भरलेली घागर

खयाल का चघळावे? करतो सामाजिक प्रश्नास उजागर 

श्रोत्यांना आवडती गझला, नाव ठेवती प्रकांड शायर

आठवणींनी सुसह्य होते जीवन आई अन् बाबांचे

जरी उडाले बाळ जावया, पार करोनी सात समिंदर

जिथे नांदते दु:ख नेमके तिथेच जाती उदास वारे

वेदनेतही हसावयाचे शिकून व्हावे जरा कलंदर

असून, निर्गुण निराकार तो, मनात मूर्ती सदा विराजे

संस्कारांचे पालन करण्यावाचुन का असते गत्यंतर

गरळ ओकती सभेसभेतुन, प्रशासनाची किती टवाळी!

शंका आहे विरोधकांना, जमेल का करणे सत्तांतर?

या वयात "निशिकांत" कशाला लिहावयाची कवणे हिरवी?

जरी सुरकुत्या, मनात हिरवळ जपावयाला हवी निरंतर

निशिकांत देशपांडे, पुणे.

मो.क्र. ९८९०७ ९९०२३