मरगळीने ग्रासले आहे
इरादे कैक असुनी मरगळीने ग्रासले होते
बुलंदीला मनाच्या वास्तवाने जखडले होते
यशाने एवढ्याशा ठेंगणे आकाश झाल्यावर
करोनी ऊंच टाचा नभ धरावे वाटले होते
लिहूनी पूर्ण करता आत्मवृत्ताला कळाले की
सखीच्या वावराने सर्व पुस्तक व्यापले होते
कुणी मनमोकळे करण्यास अपुले खास नसल्याने
बसोनी एकटी मी आरशाशी बोलले होते
उदासी पाचवीला पूजलेली जीवनी माझ्या
करंट्या प्राक्तनावर मीच माझ्या हासले होते
पणाला लावता येते गरज पडल्यास भार्याही
जगाला पांडवांच्या वागण्याने दावले होते
जगाची पेठ व्यवहारी इथे होतो नफा तोटा
कधीही ना कुणी येथे कुणाला पावले होते
पुरे हे वाचणे पत्रे जुनेरी नित्त्यनेमाने
जिने लिहिलीत ही पत्रे, तिनेही भोगले होते
उठा म्हणताच उठल्याने, बसा म्हणताच बसल्याने
घरी " निशिकांत"च्या शांतीसवे सुख नांदले होते
निशिकांत देशपांडे, पुणे
मो क्र ९८९०७ ९९०२३
वृत्त--वियदगंगा
लगावली---लगागागा चार वेळा
No comments:
Post a Comment