वेदनांना लावलेला धाक आहे
दु:ख आता जाहले बेबाक आहे
लीनतेने वागतो सर्वांसवे पण
लोक म्हणती की कण्याला बाक आहे
टाकला स्फुल्लिंग का धर्मांधतेने?
गाव सारे जाहलेले खाक आहे
हे प्रभू! शेजार तू बदलून दे ना!
नाव असुनी पाक, तो नापाक आहे
दशरथाला पूस जा महती स्त्रियांची
कैकयीने पेललेले चाक आहे
पिंड शिवण्याची न चिंता आज क्षेत्री
गावचा नेता भुकेला काक आहे
दोन छिद्रे श्वास घेण्या राहिल्याने
खुश! जरी का कापलेले नाक आहे
पोळल्याने दूध इतकी काळजी का?
फुंकले पिण्याअधी, ते ताक आहे
आज का " निशिकांत "अश्रू नर्क मिळता?
स्वैर जगण्याचाच हा परिपाक आहे
निशिकांत देशपांडे. मो.क्र. ९८९०७ ९९०२३
No comments:
Post a Comment