केवढा अंधार आहे

दाटलेला केवढा अंधार आहे !
तेज लपले हे किती बेकार आहे

प्राक्तनाला मी दिला आकार आहे
स्वप्न झाले त्यामुळे साकार आहे

बेहिशोबी संपदा चिक्कार आहे
मान मिळतो, ना कधी धिक्कार आहे

सदगुणांची आरती नुसतीच होते
दुर्गुणांचा मात्र जयजयकार आहे

सांजवेळी एकटेपण भोगण्याचा
सुरकुत्यांना शाप पूर्वापार आहे

बद असूद्या पण नको बदनाम होणे
केवढा ढोंगी छुपा संस्कार आहे!

पारदर्शी काच असताना उपेक्षित
आरसा झाल्यावरी परिवार आहे

मारुनी मन वागणे हा एक अर्थी
मीच करतो मजसवे व्यभिचार आहे

कैक पापे सिध्द होऊ ना दिल्याने
योजिला "निशिकांत "चा सत्कार आहे


निशिकांत देशपांडे. मो.क्र. ९८९०७ ९९०२३