हसावयाला शिकू लागलो

दु:खासंगे हसावयाला शिकू लागलो
मी माझ्या जगण्याला जगणे म्हणू लागलो

हात बघोनी भविष्य सांगत फिरू लागलो
पोट भराया, उधार स्वप्ने विकू लागलो

याचक नजरेने देवाला बघू लागलो
माझ्यामधल्या भक्ताला संपवू लागलो

गल्लीमधल्या वाण्याशी संबंध जुने पण
अंतरजालावरी खरेदी करू लागलो

नउवारी कवितांना आता कोण वाचते!
मिनीस्कर्टच्या चारोळ्यांना लिहू लागलो

पोहायाच्या कपड्यासम दोनोळ्या आल्या
पुढे काय? मी डोळे मिटुनी बसू लागलो

कधीच होका यंत्र घेतले नसून सुध्दा
दिशा जीवनी मीच ठरवुनी निघू लागलो

"हर कुत्तेके दिन होते है" असे ऐकता
दोस्ती करण्या श्वानासंगे पळू लागलो

परवड " निशिकांत "ची जाहली जगण्यासाठी
मरण्याआधी मरूनही पण जगू लागलो


निशिकांत देशपांडे. मो.क्र. ९८९०७ ९९०२३