जरा गर्दीत राहूद्या

नको ते एकटे जगणे, जरा गर्दीत राहूद्या
स्वतःशी बोललो, इतरासवेही आज बोलूद्या

बुडालो घोर तिमिरी अन् पुन्हा रस्ता भुयाराचा
मला अंधूकसा माझा कवडसा आज होऊद्या

सुखाचे तिर्थ का देतोस आयुष्या जगायाला?
मला भरपूर दु:खाचे प्रभूला दान मागूद्या

हजारो जोडलेले सांजवेळी पांगती सारे
रहायाचे जयांना राहतिल इतरास जाऊद्या

निराशा ओतली फेसाळत्या प्याल्यात का माझ्या?
अता हरवून माझे होश, थोडेसेच बहकूद्या

उशाला बैसले कौरव नि पांडव पाच पायाशी
मिळाली लीनतेला साथ हे सर्वास समजूद्या

कराया नागडे नेत्यांस व्रत घ्या कार्यकरत्यांनो
कपाटे सापळ्यांची** बेधडक तरुणास उघडूच्या

नको उपकार कोणाचे, नको आभार कोणाचे
जगायाचे कसे मी हे, मला माझेच ठरवूद्या

नको "निशिकांत "तू मागूस कांही. सर्वज्ञानी तो
मला जे पाहिजे ते नेमके देवास देवूद्या

कपाटे सापळ्यांची याचा अर्थ स्केलेटन्स इन कपबोर्ड या ईंग्रजी फ्रेजचा संदर्भ घेऊन काढावा.


निशिकांत देशपांडे. मो.क्र. ९८९०७ ९९०२३