उरला सहारा

नको शुक्रतारा नको मंद वारा
अता काहिलीचाच उरला सहारा

जरी राज्य आले अता सुरकुत्यांचे
कशी कात टाकू जगाया दुबारा

नकाशातही गाव माझे दिसेना
कुठे वेस गेली, नदीचा किनारा

मला कोणता पक्ष देईल संधी?
न येतो मला वाजवाया नगारा

सडेतोड असल्यामुळे दूर सारे
कुणाचा कधीही न झालो दुलारा

नको जीवघेणी अशी शांतताही
खुल्या बडबडीचाच यावर उतारा

मनाने कुणी तर कुणी संपदेने
भिकारीच सारे, कसा हा नजारा?

जुने मायबोलीतले शब्द गेले
जरा ओळखा काय असतो खरारा**

जगावेस "निशिकांत " हळुवार आता
पुरे कालचा धाक आणिक दरारा


निशिकांत देशपांडे. मो.क्र. ९८९०७ ९९०२३
**घोड्याचे लोखंडी तारेच्या ब्रशने सर्व अंग घासतात ज्यामुळे अंगावरचे केस साफ होतात आणि कातडीवर मसाज ही होते. या प्रक्रियेस घोड्याचा खरारा करणे असे म्हणतात.