दीप आता मालवू या

दीप आता मालवूया
एकमेका जागवूया

सप्न एकच आपुले जे
आज दोघे आठवूया

कागदी जी सोडलेली
नाव चल ती वल्हवूया

साथ ज्यांनी सोडलेली
आज त्यांना बोलवूया

संशयाचे भूतही पण
निश्चयाने घालवूया

जे पसाभर कमवलेले
त्यात सारे भागवूया

लाख मिथ्या जग असू द्या
एकमेका गुंतवूया

दाह जो जगण्यात आहे
हासण्याने शांतवूया

लाचखोरी माजलेली
या मशाली पेटवूया

वेदनांच्या कुंचल्याने
जीवनाला रंगवूया

ठरवले "निशिकांत "नेही
संकटांना जोजवूया


निशिकांत देशपांडे. मो.क्र. ९८९०७ ९९०२३